အကြီးစား ကျောက်စိမ်းတူးဖော်ခြင်း ပိတ်ပင်သော ဥပဒေ သစ် အတည်ပြု

အကြီးစား ကျောက်စိမ်းတူးဖော်ခြင်း ပိတ်ပင်သော ဥပဒေ သစ် အတည်ပြု
Share

အလတ်စားနှင့်အသေးစား ကျောက်မျက်တူးဖော်ရေးအခွင့်အလမ်းများ ပိုမိုရရှိလာရန်အတွက် အကြီးစား လုပ်ကိုင်ခွင့်လိုင်စင်ကို မြန်မာ့ကျောက်မျက် ဥပဒေကြမ်းမှာ ပိတ်ပင်လိုက်ပြီဖြစ်ကြောင်း ဒီဇင်ဘာ ၁၈ရက် နေ့တွင် ပြည်ထောင်စုလွှတ်တော်က အတည်ပြုလိုက်ပါသည်။

အတည်ပြုတင်ပြခဲ့သော ကျောက်မျက်ဥပဒေကြမ်းတွင် ပြည်သူများ၏ အသက် အန္တရာယ်ကာ ကွယ်ရန်နှင့် သဘာဝပတ်ဝန်းကျင်ထိန်းသိမ်း ကာကွယ်စေလိုသောရည်ရွယ်ချက်ဖြင့် အကြီးစားကျောက်မျက်တူး ဖော်ရေးလိုင်စင်ပိတ်ပင်ခြင်းသဘောဖြစ်သည်ဟု ဖားကန့်မြို့နယ် အမျိုးသားလွှတ်တော် ကိုယ်စားလှယ် ဦးခင်မောင်မြင့်က ကချင်သတင်းဌာန KNG ကို ယခုလို ပြောသည်။

“အင်မတန် တန်ဖိုးကြီးတဲ့ အရည်အသွေး အဆင့်မှီ ကျောက်စိမ်းက ကျနော်တို့ မြန်မာနိုင်ငံမှာဘဲထွက်ရှိတယ်။ အဲ့တာကို စက်ယန္တယားအကြီးတွေနဲ့ အကြီးစားတူးဖော် လုပ်ကိုင်နေကြတယ်။ ဈေးကွက်ကိုလည်း သိပ်ကျယ်ကျယ်ပြန့်ပြန့် လုပ်ဆောင်နိုင်တာမရှိဘူး။ နောက်ဆုံးက သဘာဝ ပတ်ဝန်းကျင်ပျက်စီးတယ်။ လူတွေရဲ့အသက်အန္တရာယ်များကြီးဆုံးရှုံးရတယ်။ ဒီဖြစ်စဉ်တွေကို ကာကွယ်ဖို့ ဥပဒေအသစ်ကို ပြင်ဆင်ရတယ်။”

ယင်းဥပဒေကြမ်း၏ အဓိကထူးခြားချက်မှာ ၂၀၁၀ခုနှစ် အမျိုးသားလွှတ်တော်ကိုယ်စားလှယ်များက ကျောက်မျက်လုပ်ငန်း လုပ်ကိုင်ရန်အတွက် လုပ်ကွက်အကျယ်အဝန်း ဧက ၅၀ အထက်နှင့် အကြီးစား ကျောက်မျက်တူးဖော် လုပ်ငန်းကို ခွင့်ပြုထားသည်ဖြစ်ပြီး ယခုအတည်ပြုထားသည့် ကျောက်မျက် ဥပဒေမှာ ၅ ဧကထက်မပိုသော စနစ်ဖြင့် ကျောက်မျက်တူးဖော်ရေးခက်ခဲအောင် ပြုလုပ်ထားခြင်း ဖြစ်သည်ဟု သူကဆက်ပြောသည်။

ထိုသို့ အလတ်စားနှင့် အသေးစားကျောက်စိမ်းတူးဖော်ရေးရရှိရန် မြစ်ကြီးနားမြို့ နှင့် ဖားကန့်မြို့အတွင်း ၃ကြိမ်တိုင် ဆန္ဒပြဖော်ထုတ် ခဲ့ကြသော ဖားကန့်အခြေစိုက် သဘာဝပတ်ဝန်းကျင်ထိန်းသိမ်းရေး အဖွဲ့ Green Land က ဥက္ကဌ ဦး Ying Hkaw ကျောက်မျက်ဥပေဒသစ်က တိုင်းရင်းသားပြည်သူ များအတွက် အားထားရသော ဥပဒေဖြစ်စေလိုကြောင်း ယခုလို သုံးသပ်ပြောဆိုပါသည်။

“ဥပဒေဆိုတာ ဘယ်ဥပဒေမဆို အရမ်းကောင်းတယ်။ အခုကျင့်သုံးနေတဲ့ ဥပဒေလည်း အရမ်းကောင်းတယ်။ ဒါပေမယ့် စာထဲမှာဘဲကောင်းတယ်။ လက်တွေ့ မကျင့်သုံးကျဘူး။ အခုထွက်လာမယ့် ကျောက်စိမ်း ဥပဒေ သစ်က ပြည်သူများအတွက် ကောင်းမွန်တဲ့ ဥပဒေဖြစ်စေချင်ပါတယ်။”

လက်ရှိ ပြည်ထောင်စုအဆင့်တွင် တင်ပြအတည်ပြုလိုက်သော မြန်မာ့ကျောက်မျက် ဥပဒေကြမ်းကို သမ္မတ ဦးဝင်းမြင့်က လက်မှတ်ရေးထိုးမည်ဖြစ်ပြီး ၎င်းနောက် သုံးလအတွင်း အသက်ဝင်လာမည် ဖြစ်သည်။

ယခု သက်တမ်းကုန်ဆုံးမှု မရှိသေးသော ကျောက်မျက်တူးဖော် ကုမ္ပဏီအများက ဥပဒေဟောင်းဖြင့်သာ လုပ်ဆောင်သွားမည်ဖြစ်ပြီး ကုမ္ပဏီလုပ်ငန်းသစ်နှင့် သက်တမ်းတိုးလုပ်ဆောင်မည့် ကုမ္ပဏီများက ဥပဒေသစ်ဖြင့် ဆောင်ရွက်သွားမည်ဖြစ်သည်။

KNG BURMESE WEBSITEKNG KACHIN WEBSITE