ဖားကန့် ကျောက်စိမ်း လုပ်ကွက် နစ်နာကြေးကိစ္စ ရန်ကုန်မှာ သတင်းစာရှင်းလင်း

ဒီဇင်ဘာ ၁၃၊ ၂၀၁၈ ရန်ကုန် သတင်းစာရှင်းလင်းပွဲ
Share

ဖားကန့်၊ လုံးခင်းအုပ်စု ဂန္တဝင်ရပ်ကွက်ကို ကျောက်စိမ်းကုမ္ပဏီမှ လုပ်ကွက် ဧရိယာအဖြစ် သတ်မှတ်လိုက်ပြီး ဒေသခံများကို နစ်နာကြေးမပေးသောကြောင့် ဒီဇင်ဘာလ ၁၃ရက်နေ့တွင် ရန်ကုန်မြို့၊ မြန်မာဂျာနယ်လစ်ကွန်ယက် ရုံးတွင် သတင်းစာ ရှင်းလင်းပွဲ ပြုလုပ်ခဲ့သည်။

၂၀၁၀ ခုနှစ်တွင် ရတနာကြာဖြူ အမည်ရှိ ကုမ္ပဏီမှ ဂန္တဝင်ရပ်ကွက်ကို လုပ်ကွက်ဧရိယာအဖြစ် ရေးဆွဲခဲ့သဖြင့် စက်ယန္တရားအင်အားများအသုံးပြုကာ ရေနစ်မြုပ်စေခဲ့ ပြီးဒေသခံများ၏ အိုးအိမ်၊ အမြုံများ ပျက်စီးဆုံးရှုံးမှုများဖြစ်ခဲ့သည့်အတွက် ရွှေ့ပြောင်းနေထိုင်ခဲ့ရကြောင်း ဒေသခံများမှသိရသည်။

အဓိကပြဿနာမှာ ကုမ္ပဏီသည် ဂန္တဝင်ရပ်ကွက်ကို လုပ်ကွက်ဆွဲခဲ့ကြောင်း လုံးဝပွင့်လင်းမြင်သာမှု မရှိသလို ဒေသခံပြည်သူများကိုလည်းလျှော်ကြေး လုံးဝ မပေးခဲ့ကြောင်းသိရသည်။ ထို့အပြင် ၎င်းဖြစ်စဉ်တွင် အာဏာပိုင်များလည်း ပါဝင်နေသောကြောင့် ဂန္တဝင်ရပ်ကွက်ကို လုပ်ကွက် ဧရိယာအဖြစ်ကြိုတင် ရေးဆွဲမှုရှိခဲ့ကြောင်းကို အချက်အလက်များနှင့် တကွ တင်ပြရန် အတွက် သတင်းစာရှင်းလင်းပွဲ ဦးဆောင်ပြုလုပ်သူ ဒေသခံ ဦးထွန်းထွန်းက ကချင်သတင်းဌာန KNG ကို ယခုလို ပြောပါသည်။

“ဂန္တဝင်ရပ်ကွက်မှာ တရားဝင်ရပ်ကွက် ဖြစ်တယ်။ အဲ့ဒီရပ်ကွက်ကို ၂၀၁၀ က သိမ်းယူလိုက်တယ်။ ကျောက်မျက် ဥပဒေအရဆိုရင် လုပ်ကွက်ဧရိယာထဲပါသွားပြီဆိုရင် ထိုက်တန်တဲ့ ကာလပေါက်ဈေးကို လျှော်ပေးရတာဖြစ်တယ်။ အာဏာပိုင်တွေနဲ့ ကုမ္ပဏီတွေက ၂၀၁၀ ကနေ ဒီကနေ့ ၂၀၁၈ အထိ လုပ်ကွက်ဆွဲထားကြောင်း မပြောဘူး။ ရပ်ကွက်ကိုလည်း ရေမြုပ်အောင် လုပ်ပေးလိုက်တယ်။ ဒါကရည်ရွယ်ချက်ရှိရှိလုပ်ပေး တယ်လို့ဘဲမြင်ပါတယ်။ ရပ်ကွက်က လူတွေလည်းအားလုံးလည်း တားပါတယ်။ ယနေ့ထိပါဘဲ။”

ထို့အပြင် ကုမ္ပဏီမှ ဂန္တဝင်ရပ်ကွက်ကို ကြိုတင် လုပ်ကွက် ဧရိယာအဖြစ်ရေးဆွဲခဲ့ခြင်းမှန်ကန်ကြောင်း အချက်အလက်အရ လုံးခင်းကျောက်စိမ်းရုံးကတဆင့် လုပ်ကွက်အခြေပြ မြေပုံတစ်ခု ရရှိထားကြောင်းနှင့် ၂၀၁၈၊ ၂၇ရက် ဧပြီလတွင်လည်း သယံဇာတ ဝန်ကြီး အကြောင်း ပြန်စာအပုဒ်ခွဲ(စ)မှာ ဂန္တဝင်ရပ်ကွက်တစ်ခုလုံး လုပ်ကွက်နေရာရေးဆွဲထားပြီ ဟူသောအချက်များ ပါလာသောကြောင်း ဆက်လက်ပြောဆိုသည်။

ဂန္တဝင်ရပ်ကွက်ဒေသခံပြည်သူများနှင့် ကုမ္ပဏီကြား ဖြစ်နေတဲ့ပြဿနာ အပေါ် ဒေသခံပြည်သူများတင်ပြချက်များမှာ မှားယွင်းနေသည့်အတွက် တိကျဖြေရှင်းလို့မရကြောင်းကို ဖားကန့်အုပ်ချုပ်ရေးမှူး ဦးကျော်စွာအောင်က ယခုလို ပြောဆိုသည်။
“ဂန္တဝင်ရပ်ကွက် နဲ့ပတ်သက်ပြီး ဒေသခံတွေရဲ့တင်ပြချက် ကမှားနေတယ်။ အတိအကျဖြေရှင်းပေးလို့မရဘူး။ လုံးခင်းမှာ ဂန္တဝင်ရပ်ကွက်မရှိဘူး။ မှော်ကျူးကျော်သူတွေက ပေးထားတာဖြစ်မယ်။ မှတ်တမ်းအရပေါ့။ အမှတ်တရားဆိုတာကြာကြာဖုံးကွယ်လို့မရပါဘူး။ ဒီနေရာကို သက်ဆိုင်ရာဌာနတွင်က စီစစ်ဆောင်ရွက်ထားပြီဖြစ်တယ်။ ကျနော်တို့အနေနဲ့လည်း ဥပဒေလမ်းကြောင်းနဲ့ဆောင်ရွက် နေတာပါ။”

ယင်းကိစ္စနှင့်ပတ်သက်ပြီး ၂၀၁၂ ဇူလိုင်လတွင် ဖားကန့်အုပ်ချုပ်ရေးရုံးသို့ တစ်ကြိမ်၊ ၂၀၁၇ ဧပြီလတွင် ပြည်နယ်ဝန်ကြီးချုပ်သို့တစ်ကြိမ် နှစ်ကြိမ် စာတင်ပြတောင်းဆိုခဲ့ပြီး ၂၀၁၇ နိုင်ဘာလ ၃၀ရက်နေ့ တွင် ဖားကန့်တွင် ဒေသခံပြည်သူများဆန္ဒပြခဲ့ခြင်းနှင့် အဆင့်ဆင့်တင်ပြခဲ့သော်လည်း သက်ဆိုင်ရာတာဝန် ရှိသူများမှ ပြေလည်အောင်ဖြေရှင်းပေးနိုင်ခြင်း မရှိသေးကြောင်းသိရသည်။

ဂန္တဝင်ရပ်ကွက် ပြဿနာမှာ ၂၀၁၀ ကစတင်ဖြစ်ပွားခဲ့သော်လည်း ၂၀၁၂ မှ ၂၀၁၆ အထိ နှစ်ဖက်တိုက်ပွဲများအလွန်ဖြစ်ပွားနေသည့်ကာလ ဖြစ်သည့်အတွက် သက်ဆိုင်ရာ အစိုးရကို တင်ပြထားသော တိုင်စာများရပ်တန့်သွားပြီး ၂၀၁၇ခုနှစ်က ပြန်လည်လုပ်ဆောင်ခဲ့ကြောင်းသိရသည်။

အဆိုပါ လုံးခင်းအုပ်စု၊ ဂန္တဝင်ရပ်ကွက်မှာ တရားဝင် အိမ်ခြေပေါင်း ၃၃ အိမ်ရှိပြီး ကျောက်စိမ်း ဥပဒေနှင့်အညီ သက်ဆိုင်ရာ တာဝန်ရှိသူများမှ ဆောင်ရွက်ပေးရန် လိုအပ်နေသောကြောင့် ရန်ကုန်မြို့တွင် သတင်းစာရှင်းလင်းပွဲပြုလုပ်ရကြောင်း ဦးထွန်းထွန်းက ပြောဆိုသည်။

KNG BURMESE WEBSITEKNG KACHIN WEBSITE
  • Popular

  • Latest