မြေလွတ် မြေလပ် မြေရိုင်း ဥပဒေကြောင့် စစ်ရှောင်များ၏ နယ်မြေ ဆှုံးရှုံးရမည်ကို စိုးရိမ်

ဇူလိုင် ၃၊ ၂၀၁၈ ရက်နေ့ ကချင်တိုက်ပွဲကြောင့် ရွာသားတွေ ထွက်ပြေးထားခဲ့ရတဲ့ ၀ိုင်းမော်မြို့နယ် Ga Ra Yang ကျေးရွာ တရုတ်ငှက်ပျောခံတွင် စစ်ရှောင်တွေ နှစ်ရှည်ပင် စိုက်ပျိုးတဲ့ လှုပ်ရှားမှု ပြုလုပ်ခဲ့တယ်။
Share

အစိုးရ အတည်ပြုလိုက်သည့် မြေလွတ် မြေလပ် မြေရိုင်း စီမံခန့်ခွဲမှု ဥပဒေကြောင့် ကချင်စစ်ရှောင်များ၏ ကျေးရွာနယ်မြေများကို ကုမ္ပဏီနှင့် လုပ်ငန်းရှင်များမှ မှတ်ပုံတင်ကာ သိမ်းပိုက်ရယူသွားမည်ကို စိုးရိမ်ကြောင်း ကချင်နှင့် ရှမ်းမြောက်စစ်ရှောင်များ နိုဝင်ဘာ ၂၇ ရက်နေ့ သဘောထား ထုတ်ပြန်ထားသည်ကို တွေ့ရပါသည်။

၂၀၁၈ စက်တင်ဘာလတွင် လွှတ်တော်မှ အတည်ပြု ပြဌာန်းသည့် မြေလွတ်မြေလပ်မြေရိုင်း စီမံခန့်ခွဲမှု ဥပဒေအရ (၆)လအတွင်း သတ်မှတ်ချက်နှင့်အညီ မှတ်ပုံတင်ရမည်ဖြစ်ပြီး ထိုပြဌာန်းချက်များကို ဖောက်ဖျက်ကျူးလွန်ပါက ၂ နှစ် ထက်မပိုသော ထောင်ဒဏ်၊ ကျပ် ၅ သိန်းထက်မပိုသော ငွေဒဏ် တို့ကို ချမှတ်နိုင်ကြောင်း ဖော်ပြထားပါသည်။

လက်ရှိ ကချင်စစ်ရှောင်များသည် နေရပ်စွန့်ခွာထွက်ပြေးနေရပြီး ၄င်းတို့၏ မြေယာများတွင် တရုတ်ကုမ္ပဏီများ လုပ်ကိုင်နေသောကြောင့် အလွန်စိုးရိမ်ကြောင်း Ga Ra Yang မှ ဦး Tu Nan ကချင်သတင်းဌာန KNG ကို ပြောပါသည်။

“အခုလောလောဆယ် ကျနော်တို့ နယ်မြေကို တရုတ်သစ်သျှူးငှက်ပျော် ကုမ္ပဏီ နှင့် တခြား ကုမ္ပဏီတွေ ဝင်နေဆဲဖြစ်တယ်။ ဒီ ဥပဒေထုတ်ပြန်လိုက်တော့ ကုမ္ပဏီတွေ၊ သူဌေးတွေက ကျနော်တို့ မြေယာကို မှတ်ပုံတင်ယူလိုက်မှာ စိုးရိမ်တယ်။ သူတို့ အဲလိုယူလိုက်မယ်ဆိုရင် ကျနော်တို့မှာ မျှော်လင့်ချက် ရှိတော့မှာမဟုတ်ဘူး။ ပြန်လမ်းလည်းမရှိတော့ဘူး။ တစ်သက်လုံး ဒီစခန်းတွေမှာ နေရတော့မှာလား ဆိုတဲ့ စိုးရိမ်သောကတွေ အများကြီးရှိတယ်။”

၂၀၁၁ ခုနှစ် ကချင်ဒေသတစ်ကျော့ပြန် တိုက်ပွဲကြောင့် လူ့အခွင့်အရေး ချိုးဖောက်ခံရပြီးသော ကချင်စစ်ရှောင် ပြည်သူများ အနေဖြင့် ယခု မြေလွတ်မြေလပ်မြေရိုင်း ဥပဒေကြောင့် ၄င်းတို့မျှော်လင့်ရာ မြေယာပိုင်ဆိုင်မှုကို ထပ်မံ လက်လွတ်ဆုံးရှုံးရတော့မည့် အခြေအနေ ဖြစ်နေကြောင်း ပြောဆိုပါသည်။

“ကျနော်တို့ နေရပ်မပြန်နိုင်ခင် ဒီကိစ္စ ရပ်နားစေချင်တယ်။ ဒေါ်စု၊ အစိုးရ တွေလည်း ကူညီပြီး ဒီ ဥပဒေကို ဖြစ်နိုင်ရန် ဖျက်သိမ်းပေးပါ။ နိုင်ငံတကာ ကျနော်တို့ကို ကူညီထောက်ပံ့နေတဲ့ UN၊ NGO အဖွဲ့တွေလည်း ဒီကိစ္စကို နည်းလမ်း ရှာပြောကူပေးပါ” ဟု ကချင်လွတ်လပ်ရေးအဖွဲ့ KIO ထိန်းချုပ် နယ်မြေ Jeyang စစ်ရှောင်စခန်းတွင် ခိုလှုံနေသော ဦး Brang Tawng တောင်းဆို ထားပါသည်။

ယခု သဘောထား ထုတ်ပြန်ချက်နှင့်အတူ စစ်ရှောင်များ၏ မြေယာကို ကာကွယ်ပေးရန် အထူးတောင်းဆိုသည့် စာကို ကချင်ပြည်နယ်ဝန်ကြီးချုပ် ဒေါက်တာခက်အောင် ကိုလည်း နိုင်ဝင်ဘာ ၂၇ ရက်နေ့ ပေးပို့ထားသည်ဟု သိရပါသည်။

ကချင်ပြည်နယ်၊ မြစ်ကြီးနား-ဗန်းမော် ကားလမ်းပေါ်ရှိ စစ်ရှောင်များ၏ ကျေးရွာများတွင် တရုတ် ငှက်ပျော်စိုက်ပျိုးရေး ကုမ္ပဏီများ ဝင်ရောက်သိမ်းယူလာခြင်းကို ကာကွယ်ပေးရန် ဒေသခံများမှ ပြညနယ်အစိုးရထံ ၂၀၁၇ အောက်တိုဘာလတွင် တစ်ကြိမ်၊ ၂၀၁၈ ဧပြီလတွင် တစ်ကြိမ် စာရေးသားတောင်းဆိုခဲ့သော်လည်း ယခုချိန် စစ်ရှောင်မြေယာများ လုံခြုံမှု ကင်းမဲ့နေဆဲ ဖြစ်သည် ဟု ပြောဆိုထားသည်။

ထို့အပြင် ကချင်ပြည်နယ်တွင်း မြေယာကိစ္စနှင့် စပ်လျဉ်းပြီး အစိုးရအနေဖြင့် ဥပဒေ ရေးဆွဲ ပြင်ဆင်လိုပါက စစ်ရှောင်များကို မပျက်မကွက် တိုင်ပင် အသိပေးသင့်ကြောင့် ဦး Tu Nan ထပ်မံ တောင်းဆိုထားပါသည်။

“စစ်ရှောင်လူထု တွေနဲ့ဆိုင်တဲ့ ဥပဒေတွေကို ပြဌာန်းတော့မယ်ဆိုရင် ကျနော်တို့ မသိတဲ့ဟာ၊ ကျနော်တို့နဲ့ မတိုင်ပင်ဘဲနဲ့ ဘာဥပဒေမှာ မပြန်ဌာန်းသင့်ဘူးလို့ မြင့်ပါတယ်။ နောင်နောင် မြေယာကိစ္စ ဥပဒေတွေ လုပ်မယ်ဆိုရင် ကျနော်တို့ စစ်ရှောင်တွေကို အရင်တိုင်ပင်၊ ဥပဒေကြောင်း ပြောပြပြီးမှ ပြဌာန်းပေးဖို့ အကြံပြုလိုပါတယ်။”

လက်ရှိ ပြည်တွင်းစစ်ကြောင့် ကချင်စစ်ရှောင် ၁ သိန်းကျော်သည် စစ်ရှောင်စခန်းတွင် ခိုလှုံနေဆဲ ဖြစ်ပါသည်။

KNG BURMESE WEBSITEKNG KACHIN WEBSITE
  • Popular

  • Latest