မြစ်ကြီးနား ညဈေးတန်းသစ် တွင် ရောင်းမကောင်း

မြစ်ကြီးနား ညဈေးတန်းသစ်
Share

မြစ်ကြီးနား မြို့မဈေး ညဈေးတန်းကို နေရာသစ်သို့ ပြောင်းရွှေ့လိုက်ပြီးနောက် ရောင်း မကောင်းသောကြောင့် ဈေးသည်များ အဆင်မပြေဖြစ်နေကြောင်း ပြောဆိုနေကြပါသည်။

"ခုဒီမှာက လုံးဝကို ရောင်းမကောင်းဘူး။ အရင်နေရာနဲ့ ဆိုရင် ၅ ပုံ ၁ ပုံ လောက်တောင် မရောင်းရဘူး။ အရင်နေရာကကျယ်တယ် ဒီမှာကနေရာကျဉ်းတော့ ဈေးခင်းတဲ့နေရာတွေမှာလည်း အဆင်မပြေဘူး။ ပြီးတော့ ဝယ်တဲ့သူတွေကကျတော့ ပိုနည်းသွားတယ်။ ခုဒီဈေးမှာ အားလုံးလိုလို ရောင်းမကောင်းကြဘူး" ဟု ဈေးသည် မချို က ပြောသည်။

ဈေးသည်များသည် ယခင်က ဈေး(၁)၊ ဈေး(၂)တွင် ရောင်းကြပြီး နိုဝင်ဘာ ၁ ရက်နေ့မှ စကာ ညဈေးတန်း နေရာသစ်သို့ ပြောင်းရွှေ့ခဲ့ကြကြောင်း သိရသည်။

ယခုလို ပြောင်းရွှေ့ရန် စည်ပင်သာယာရေးရုံးမှ ဈေးသည်များအား အောက်တိုဘာ ၂၈ ရက်နေ့တွင် ခေါ်ယူပြီး အစည်းအဝေးတစ်ရပ် ဆွေးနွေးပြီးမှ ညဈေးတန်းသစ်သို့ ပြောင်းရွှေ့ စေခဲ့ခြင်းဖြစ်သည်။

"နေရာရွှေ့တာလဲ ဈေးသည်တွေ နေရာ လောက်င မှုရှိအောင် စီစဉ်ပြီး ရွှေ့တာပါ။ ကျွန်တော်တို့က သေချာ စနစ်တကျ စည်းကမ်း ရှိရှိနဲ့ ဖြစ်ချင်လို့ လုပ်ဆောင်နေတာပါ" ဟု မြစ်ကြီးနားမြို့နယ် စည်ပင်သာယာရေး အဖွဲ့မှ ဒုတိယ ဦးစီးမှုး(ဈေး) ဦးဖြိုးဝေဆန်း က ပြောသည်။

ဈေးသည်များ၏ နေရာအတွက် ခရေပင်လမ်းကို အလယ်တွင် ခြားထားပေးပြီး အသား၊ ငါးများရောင်းရန် နေရာ သပ်သပ် စနစ်တကျ ပြင်စင်ထားပေးကြောင်း၊ ကုန်စိမ်းတန်းများကို ဇောဂျမ်းလမ်း အမှတ် ၁ ဈေးနှင့် ရေစင်ဈေးကြားတွင် ကြောချင်းကပ် တစ်တန်း၊ အမှတ် ၁ ဈေး နှင့် ဧရာဦး ပန်းခြံ ကြားတွင် ကြောချင်းကပ် ၂ တန်း စီစဉ်ထားပေးကြောင်း နှင့် အခြား မိုးညင်း၊ မိုးကောင်း၊ ဆားမော် ဒေသများမှ ကုန်စ်ိမ်းသည်များ အတွက်လည်း နေရာများကို သေချာ စနစ်တကျ စီစဉ်ထားပေးပြီး ယခု ပြောင်းရွှေ့ပေးထားသော နေရာများသည် ယာယီမဟုတ်ဘဲ ရေရှည် အတွက် ပြင်ဆင်ထားခြင်း ဖြစ်ကြောင်း ၎င်းကဆက်ပြောသည်။

KNG BURMESE WEBSITEKNG KACHIN WEBSITE
  • Popular

  • Latest