Wunpawng Mungdan Shanglawt Hpung (KIO) gaw Myen hpyen asuya shadut ai, KIA hpyendap hpe "Ga Jarit Sin Dap" hku hkrang galai na lam hte seng nna, mungshawa sanglang dan ai lamang hpe, May 25, mani bat Langai Ya shani, tinang uphkang Mai Ja Yang mare e galaw wa sai re.
Aten kadun mi, buga ten jahpawt hkying 11 a.m. kawn 11:30 a.m. galaw ai lamang hta, mare masha yawng 300 daram sa du shanglawm wa sai re lam, zuphpawng de sa du madat lawm ai buga masha langai tsun dan wa ai.
Zuphpawng hta, "tinang KIA dap hpe hkrang galai hpaw shabawn na lam gaw, mungmasha ni hpaji jaw ai hku sha rai wa na re lam" hte tinang hpaji jaw lam ni hpe laika hte KIO Ginjaw de sa jaw mai ai lam hpe KIO/A lit nga du salang ni tsun wa sai lam, chye lu ai.
Bai nna, maga mi de mung, mungmasha ni sadi maja nga ra na lam hpe mung, lang hte lang tsun wa sai lam, kahtap chye lu ai.
Ndai zuphpawng hta, mungmasha ni hpe ga san san na aten n lu ai raitim, zuphpawng sa masha malawng gaw, KIA hkrang galai na hpe n ra ai sha, Myen hte bai gap na mahtang, grau ra sharawng nga ma ai lam, KNG kawn sagawn chye lu ai.
Lai wa sai bat May 21 ya shani e, KIO du salang ni hte Myen ni kalang bai Jinghpaw Mungdaw daju Myitkyina e hkrum bawngban wa sai raitim, KIO kawn Myen hpe hpa mahtai n jaw shi ai re lam, KIO shiga lawk kawn chye lu ai.
May 18 hte 19 ya ni hta KIO/A daju Laiza e galaw ai KIA hkrum ra dapshawa zuphpawng hta, "KIA dap hkrang galai na lam Myen tsun shadut nga ai lam hpe" tinang dapshawa mungshawa ni hpe sanglang dan na matu, KIA Dap Awn Daju Dukaba Gunhtang Gam Shawng hte Ningbaw Malai Dukaba N'ban La Awng yan, matsun wa sai re.
0 Comments