Wunpawng Mungdan Shanglawt Hpyendap (KIA) Dap Awn Daju (Chief of Staff) Dukaba (Maj-Gen) Gunhtang Gam Shawng gaw, KIO a yaw shada ai mungmasa bandung n du shi yang, tinang KIA laknak jahkrat na snr dap hkrang galai hpaw na lam hpe, tsepkawp myit n hkrum ai lam, KIA shiga lawk kawn chye lu ai.
Ndai lam hpe Dukaba hku nna Amerikan mungdan de daju ai New York Times shiga dap de asan abrang tsun tawn shachyu mung re. Shi gaw jet ai Federal Democracy (Mung hpawm democracy) hpe kam hpa ra sharawng ai wa re lam, chye lu ai.
Bai, dukaba gaw, lai wa sai 2008, May shata 10 ya shani galaw ai, Myen hpyen asuya a "Mungdan Gawda ai tara nhprang" shawa ara hkam la poi (Referendum) hta, KIO Ginjaw gaw tinang dapshawa mungshawa yawng hpe "aming" hte madi shadaw me jaw shangun sai raitim, Dukaba Gam Shawng gaw, "ninghkap me" mahtang jaw sai lam, KIA shiga lawk kawn chye lu ai.
Dukaba a aming hte sha, lai wa sai May 10 ya kawn KIO/A daju Laiza e mung, Norway Mungdan daju ai, Myen ga hte shapoi ai, DVB TV (Democratic Voice of Burma TV) hpe Laiza TV hta shapoi na ahkang jaw wa sai lam, Laiza shiga lawk kawn chye lu ai.
Shawng e gaw, ndai DVB TV hpe Laiza TV lamang (Channel) hta tsepkawp n madun na matu, Myen a Mungbawng Zuphpawng (National Convention, NC) lung ai KIO ningbaw kawn pathkum tawn ai re lam, Laiza buga masha ni kawn chye lu ai.
Bai nna, lai wa ai April 28 ya, Jinghpaw mungdaw daju Myitkyina e jung ai Myen hpyen asuya a Dingdung Daw Daju (Ma Pa Hka) e KIO/A ningbaw ni hpe Ma Pa Hka Dap Up (Taimu) Brig-Gen Soe Win shaga zuphpawng galaw wa sai shaloi, dukaba Gunhtang Gam Shawng hpe mung zuphpawng shaga sai raitim, shi sa na ningdang kau ai lam, KIA shiga lawk kawn chye lu ai.
Dukaba Gam Shawng gaw, KIA kata, matsun hpe n yit n hprai hkan nang hkan sa chye ai wa hte, Hkristan makam masham kaba ai wa mung re lam, KNG kawn sagawn chye lu ai.
Ndai ten, Myen gaw, mungdan kata na kaga amyu bawsang simsa lam hpung ni hpe zawn, KIA hpe mung, "Ga Jasit Sin Dap", dap dung langai hku sha, hkrang galai hpaw na tsun shadut nga sai re.
Bai nna, Myen gaw, KIO ngu ai mungmasa hpung masha ni mung, mungmasa pati ni hpaw nna 2010 ralata poi shang shingjawng lawm mai ai lam, ga saw tsun nga sai re.
0 Comments