Kachin News Group - Kachin

Myen mung mare kaba Yangon na, Tun Foundation Bank kawn woi galaw ai 3 lang na, sumla soi shingjawng poi hta, Mali-N’Mai Zup sumla soi ai, Zaw Zaw ngu ai wa, No. 1 lu mat ai hpe chye lu ai.

Lai wa sai shaning 2009 December shata 12 ya shani galaw ai, sumla soi shingjawng poi hta, Mali Hka hte N’Mai Hka hte hpawn, Mali-N’Mai Zup ni lawm ai sumla hpe, soi nna, shang shingjawng ai kaw, Zaw Zaw a sumla No. 1 lu mat ai re lam, Tun Foundation Bank na ni tsun ai.

“Zaw Zaw gaw, Mali Zup sumla hte No. 1 lu mat ai re, ndai zawn sha, dai ning mung shingjawng poi naw galaw na re,” nga nna, Tun Foundation na magam gun langai, Kachin News Group de tsun ai.

“Shi gaw, kumhpa hku nna, Myen kyat sen 30 hte, ja dazik mung shagrau hkrum ai,” shi matut tsun ai.

Zaw Zaw gaw, shang shingjawng ai masha 281 a sumla 375 nga ai kaw na, shi a “Irrawaddy” ngu shamying da ai, Mali Hka sumla gaw numbat langai lu mat ai lam, mungdan kata bat mi lakang shapraw ai, “7 DAY NEWS JOURNAL” a December 17, 2009 ya nhtoi (bat Mali ya) hte shapraw ai shiga hta mu lu ai.

Myen mungdan a ka-ang hku lwi hkrat nga ai, Mali Hka gaw, galu de, Kilometer 2,170 daram hte, ya ten hta gaw, Mali-N’Mai Zup e hka wanjak kaba shachyaw nga sai majaw, dai labau shang hka mazup hten mat na myit tsang ra sai re.

Myitkyina a dingdung de deng 20 jan tsan ai kaw nga ai, Mali Zup (Myen hku Myitsone) hka madim masing hpe, lai wa sai shaning December 21 ya shani tara shang hpaw poi galaw dat sai hta, lit la galaw ai ni gaw, Miwa asuya a China Power Investment Cooperation (CPI), Asia World Company hte Myen asuya ni rai nga ai.

“Ndai December sumla soi shingjawng poi hta Mali Hka (Irrawaddy) byin wa ai, Mali hte N’Mai Hka hpe shagrau sha-a ai sumla hpe No. 1 jaw ai majaw, KDNG hku na arawng laga ai. Ndai gaw Mali Hka nu, manu shadan ai lam hpe shadan shadawng ai lam langai rai nga ai,” nga nna Jinghpaw Wunpawng Bawngring Mahkri Shawn Hpung (KDNG) a tsun shaga ahkang lu, shayi Ah Nan, KNG de tsun ai.

“Raitim ndai hku Myen mung masha ni hku na shagrau sha-a ai Mali Hka gaw kade nna yang Myitsone madim galaw ai a majaw hten za mat na hkyen sai.  Ndai hku Mali Hka tsawm htap ngang grin na matu kyem rem mazing sa wa na matu saw shaga mayu ai,” nga nna, Burma Rivers Network a magam gun langai mung rai nga ai, Ah Nan matut tsun ai.

Mali-N’Mai Hka madim masing hpe, mung kata na ni matut ninghkap ai lam ni galaw nga ai zawn, mungdan shinggan de du nga ai Jinghpaw ni mung, sen htu da ai, ninghkap laika pa hpe, Miwa Hkringmang Du Wen Jiabao hpang de du nara ai January shata 26 ya hta tang shawn na matu hkyen lajang nga ai re.

Irrawaddy ginwang kaw nga ai, hkau na la langai gaw, “Ndai hka madim masing a majaw, Mali Hka hpe, shanu na hkai lu hkai sha galaw nga ai ni gaw, jam jau wa na re” nga, KNG de tsun ai.

“Lamu ga tsaw ai (Lahta) de na hkau na galaw sha ai ni gaw, dai hka madim a majaw, hka n lu mat na manghkang ni byin wa sana re,” nga shi tsun ai.
Raitim shanhte panglai hkin gau makau kaw nga ai ni na matu gaw, marang law ai majaw n tsang ra ai nga matut tsun wa ai.

Hka madim masing a majaw, J.W myusha ni a labau shang shara mat mat na sha nga, dai masing makau grup-yin kaw nga ai, masha n law htum 15,000 mung ya ten, kaga shara de htawt sit na matu, Myen hpyen asuya tau tsun da sai re.

KDNG dip shapraw ai sumtang laika ni hte maren nga yang, ndai Mali Zup madim a majaw, Myitkyina hte hka nam hka lam dingyang nga ai, masha wan 3 jan gaw, lama madim daw ru wa jang, hka hpyen kaba hkrum katut wa na re nga, sadi jaw tawn ai.