Kachin News Group - Kachin

Jinghpaw Wunpawng Hkalup Hpung, hpung shawa hkying lam gaw, “Mali Zup hka madim masing kaba n byin hkra” nga, lani mi tup, akyu arau sha jawm hpyi ai lamang hpe Jinghpaw mungdaw e galaw sai re.

Laksan shawa akyu jawm hpyi ai lamang hpe Myitkyina Ginwang Hkalup Hpung shangwang kata nga ai buga hpung 59 hta, arau sha n sim n sa akyu jawm hpyi ai lam hpe, Myen mung ten mani hpawt hkying 6 kawn dai hpawt hkying 6 du hkra, galaw sai lam, nawku hpung shiga lawk hku chye lu ai.

Akyu hpyi na lam Myitkyina Ginwang Hkalup Hpung Ginjaw kawn matsun ai gabaw kaba 6 hta, madung dat ai gaw Mali-N’Mai Zup e gawgap nga ai hka wanjak masing n byin na matu hte, de a majaw n ji n ku hkam sha nga ai buga masha ni a matu re lam, nawku hpung woi ni tsun ai.

Mungdaw mare daju Myitkyina e rung jung ai, Myitkyina Ginwang Hkalup Hpung Ginjaw gaw hpung masha sen mi ram hte J.W Hkalup Hpung Ginjaw (KBC) kata kaba dik ginwang re.

Myitkyina, Du Mare Buga Hkalup Hpung na sara langai tsun ai, “Ndai kalang gaw, ginwang ting lani mi sha, aten langai hta, rau jawm akyu hpyi ai shawng na lang rai re. Masha law law hte jawm hpyi ai majaw grain n-gun lu ai,” nga ai.
Ndai hkying hkum 24 shawa akyu jawm hpyi ai lamang ni hpe nawku jawng ni kaw galaw ai hta, hpung masha tsa kahtap, langai hpang langai, masat da ten hta akyu hpyi wa sai lam, akyu hpyi ai hpung masha ni Kachin News Group de tsun ai.

MKN Ginwang rung amu gun langai KNG tsun ai, “Madung gaw, Mali Zup hka madim a matu re.  Kaga lam ni gaw, buga hpung ni hte seng ang ai, asuya ni a lapran manghkang byin ai lam ni a matu re.  Anhte kaw mayak manghkang law law nga ai majaw, akyu hpyi ai rai nga ai. Anhte kaja wa kam ai myit hte Karai Kasang kaw hpyi yang, kaja wa nan lu wa na re,” nga ai.

Shi matut nna, “Ya ten KIO (Wunpawng mungdan shanglawt hpung) mung hpa n lu galaw ai, anhte mung masha ni mung hpa n lu galaw ai, anhte gaw, shahte Myen ni a mayam hku nna, zingri zing rat ai npu kaw naw nga ra ai re, raitim lani mi hta gaw, anhte ra sharawng ai lam ni byin wa na hpe kam ai,”.

Bai kaga nawku hpung hte n seng akyu hpyi ai hta, Hugawng Pa, Ledo snr Stilwell Lam mayan nga ai nawku hpung masha ni gaw, Yangon na Yuzana company a lamu ga la ba ga-up zing la hkrum ai majaw, dai chyauman bu ni lamu ga hte htunghking hte seng nna yak hkak hkrum ai lam ntsa, re.

Kaga akyu hpyi gabaw kaba langai gaw, Myen mungdan hta Karai Kasang ra tsaw awng sharawng ai mung masa n’nan gaw de la lu na matu re.

J.W amyusha ni ninghkap tawn ai lapran, maning December 21 hta Mali Zup e hka madim galaw hpang sai lam, tara shang hpaw poi lamang hpe mungdan Myen hpyen asuya galaw sai.

J.W Bawngring Mahkri Shawn Hpung (KDNG) sumtang laika hta, dai madim a majaw grup yin buga masha, Jinghpaw ni maram15,000 gaw, atik anang htawt sit ra na rai nna, lama madim daw hten wa jang mung masha sen lam, hka hpyen hkrum na re, nga ai.

Ya ten Myitkyina buga masha ni lapran hkrum shaga jahta shagu, ndai madim hte seng ai gaw n lawm n mai, gabaw langai hku, n ra sharawng let grau grau tsun jahta nga ma ai lam, buga masha ni hpe lakap let chye lu ai.

“Kaja wa yawng gaw, ndai hka madim a majaw byin wa na manghkang ni hpe hkrit tsang nga sai raitim kadai mung, gara hku masa nga ai hpe atsawm n chye ai.  Asuya kaw na mung ndai hte seng nna, ndau ai lam hpa n nga ai. Ndai gaw, mung masha ni a hkrat sum lam langai rai nga ai. Shanhte asuya ni gaw, shanhte na bungli matut galaw na sha rai nga ai” nga nna, hpung salang langai KNG de tsun ai.

Myitkyina chyauman buga salang langai mung, “Anhte hkrit gaw hkrit ai, raitim shani shagu na matu lu na shana hte seng nna, galaw lu galaw sha ra ai majaw, n rau myit tsang ai,” nga ai.

Mung kata shinggan kaw nga ai, Jinghpaw ni mung ndai madim gawgap masing hpe matut ninghkap nga ai zawn, Singapore kaw nga ai, Jinghpaw 100 jan mung kaga mungdan hkan du nga ai myusha ni hte maren, ta masat galaw da ai, hka madim ninghkap laika pa hpe, Miwa Hkring Mang daju Wen Jiabao hpang de shalai na matu, jin jin rai nga sai re.

Mung kata na hka madim ninghkap shamu shamawt ai ni hpe, Myen asuya kawn hkan rim nga ai re. “Nye manang langai ndai ninghkap ai lam kaw lawm ai hpe Myen ni chye mat na, ya hprawng taw nga ai,” nga nna, madim ninghkap myit rawt shamu shamawtai  ramma langai KNG de tsun ai.