Wunpawng Mungdan Shanglawt Hpung (KIO) datkasa hpung gaw Myen hte hkrum na matu, tinang Miwa ga jarit Laiza daju kawn Jinghpaw mungdaw mare daju Myitkyina kaw, mani kaw na du nga sai lam, chye lu ai.
Ndai December shata n htum shi yang, uhpung lahkawng lapran hkrum shaga na matu myithkrum tawn sai hte maren, ya na zawn KIO salang ni Myitkyina yu wa ai re lam, KIO shiga lawk hku chye lu ai.
KIO salang ni hte ni kahtep ai shiga lawk hku chye lu ai gaw, ndai zuphpawng hta KIO datkasa ni gaw, Naypyitaw lithkam salang Lat Du Daju Jum Ye Myint hte hkrum na n re sha, Myitkyina e daju ai hpyen asuya a Dingdung Daw Daju, dap-up Du Daju Soe Win hte mahtang, hkrum na re, nga ai.Ndai zuphpawng hte seng nna, Htai mungdan, Bangkok e nga ai KIO Maigan Matut Mahkai ningtau lithkam Dukaba James Lum Dau tsun ai, “Ndai zuphpawng de KIO bawngban na gabaw n’nan hpa n la sa ai. Shawng e tang madun tawn ai lam ntsa, hpyen asuya a mahtai na lu na matu re”.
KIO hpung hpe tingnyang-up malai 1 Lat Du Daju Jum Gauri Zau Seng woi awn let, ningbaw kaba Lanyaw Zawng Hra, Ninggawn Amumadu Dr. Lahkyen La Ja hte kaga ginjaw salang ni mung shanglawm ai lam, KIO salang ni tsun ai.
Lai wa sai April shata kawn Myen gaw KIO hpe shi npu taw ai Jarit Sin Dap (Border Guard Force) gale na dip n-gun jaw nga dingyang raitim, dai hpe KIO n hkap la ai re.
Maga mi de, KIO hku nna Myen de jahtum tang madun tawn ai lam gaw, “Hpyen asuya gaw Munghpawm Myen mungdan byin wa ai ningpawt Panglong Ga Shaka hpe hkrak tup hkapla ta tut hkan sa ai rai yang, KIO gaw laknak yawng ap kau na re lam” ngu ai re.
Lai wa sai October shata kawn Myen hte KIO lapran, BGF gabaw n’tsa bawngban hkat ai lam hkring mat sai raitim, ya shaning htum wa na mahka e kalang bai hkrum shaga na lam pru wa ai, rai nga ai.
Ndai ten, laknak hpai KIA hpyendap gaw, Myen a htu gasat majan ninghkap na yaw shada let, tinang uphkang gaiwang ni hta, hpyen masa hku maja nga dingyang re lam, KNG sagawn chye lu ai.
