လျှို့ဝှက် ဖမ်းဆီး ခံရသော ဦး နော်ဂျာ အား လွတ်ပေးရန် မိသားစု တောင်းဆို

လျှို့ဝှက် ဖမ်းဆီး ခံရသော ဦး နော်ဂျာ အား လွတ်ပေးရန် မိသားစု တောင်းဆို

မြန်မာစစ်တပ် ၏ လျှို့ဝှက် ဖမ်းဆီး ထားခြင်း ခံနေရသည့် လီဒိုလမ်းမပေါ် လဝါး ကျေးရွာမှ သားသမီး ၅ ဦး၏ ဖခင် ဦး အင်လမ်း နော်ဂျာ အား လွတ်ပေးရန် မိသားစုဝင်များ က ဇူလိုင် ၂၄ ကချင်ပြည်နယ် ဝန်ကြီးချုပ် နှင့် မပခ မြောက်ပိုင်းတိုင်း စစ်ဌာနချုပ် ထံ စာဖြင့် တောင်းဆို ထားသည်။

ဇွန်လ ၂၀ ရက်နေ့၊ မွန်းလွဲ ၃ နာရီကျော်ခန့် လဝါး ကျေးရွာ အတွင်း အစိုးရတပ် နှင့် ကချင် လွတ်လပ်ရေး တပ်မတော် KIA တို့ ထိတွေ့တိုက်ပွဲ အပြီး Slg. N’lam Naw Ja (ဦး အင်လမ်းနော်ဂျာ) သည် နေအိမ်မှ အရက်မှုးပြီး ရွာဈေးတန်း ရှိရာဘက်ကို ထွက်လာစဉ် တပ်မတော် စစ်သားများက သေနတ်ဒင်ဖြင့် ထု၊ လက်နောက်ပြန် ကြိုးတုတ်ပြီး ဖမ်းဆီးသွားသည် ဟု ဆိုထားသည်။

ဦး နော်ဂျာ ကို အစိုးရတပ်မှ ဖမ်းဆီး ခေါ်ဆောင်သွားသည်မှာ လဝါး ကျေးရွာ သားများ မျက်မြင် သက်သေဖြစ်ခဲ့သည်။

ဖမ်းဆီးသွားခြင်း ၁ လ ကျော် ကြာသွားချိန် အထိ ဖခင်၏ သတင်းကို တပ်မတော်ဘက်က ကွယ်ဝှက်ထားဆဲ ဖြစ်ကြောင်း သမီးဖြစ်သူ N’lam Kaw Mai (မ အင်လမ်း ကော့မိုင်) က ကချင်သတင်းဌာန KNG ကို ယခုပြောသည်။

“အခုထိ ဘာသတင်းမှ မရတော့။ တစ်ခုခု လုပ်လိုက်ပြီလား။ ဒါမှ မဟုတ် ဒီအတိုင်း သူတို့ (စစ်တပ်) က ဖမ်းချုပ်ထားပြီး ဒုက္ခရောက်နေလား။ သတ်လိုက်လို့ မိသားစုတွေကို ဘာမှ မပြောဘဲ ကွယ်ဝှက်နေ တာလား ဆိုတာ ကျမတို့က သိချင် နေပါတယ်။”

ဦး နော်ဂျာ ကို ဖမ်းဆီးသွားသည့် တပ်မတော် စစ်ကြောင်းတွင် တပ်ရင်း ခလရ ၈၆၊ ခလရ ၂၉၇၊ ခလရ ၂၉၈ တို့ပါဝင်ပြီး ခလရ ၂၉၇ မှ ဒုတပ်ရင်းမှူး စောဘိုဘိုလွင် က စစ်ကြောင်းမှူးဖြစ်ကြောင်း သိရှိသည်။ သို့သော်လည်း ဖခင်၏ အကြောင်းကို အဆိုပါ တပ်ရင်းများတွင် မိသားစုဝင်များ စုံစမ်းသော်လည်း တိကျသော အကြောင်းပြန်ခြင်း မရှိဟု တောင်းဆိုစာ တွင် ဖော်ပြထားသည်။

သမားရိုးကျ စိုက်ပျိုးရေး လုပ်ကိုင်ဖြင့်သာ အသက်ဝမ်းကြောင်း နေသည့် ဦး နော်ဂျာ သည် သားသမီး ၅ ယောက်၏ ဖခင်ဖြစ်သည်။ သားသမီးများ အနက် အငယ်ဆုံးသည် ယခုနှစ် ၁၀ တန်းကို သင်ယူနေကြောင်း သိရသည်။

ထို့ကြောင့် ဦး နော်ဂျာ အား တပ်မတော် စစ်ကြောင်းများ ဖမ်းဆီးသွားခြင်း ကိစ္စကို အမြန်ဆုံး စုံစမ်းစစ်ဆေး အရေးယူပေးရန် မိသားစုဝင်များက ပြည်နယ် အစိုးရအဖွဲ့ နှင့် တိုင်းမှုးတို့ထံ တောင်းဆိုစာ တင်ထားပြီး မိတ္တူကို နိုင်ငံတော်အတိုင်ပင်ခံရုံး၊ မြန်မာနိုင်ငံ လူ့အခွင့်အရေး ကော်မရှင် နှင့် မြန်မာ နိုင်ငံဆိုင်ရာ လူ့အခွင့်အရေး အထူး ကိုယ်စားလှယ် တို့ထံ ပေးပို့ထားသည် ကို တွေ့ရသည်။

ကချင်ပြည်နယ်တွင်း မြန်မာစစ်တပ်မှ ဒေသခံ ရွာသားများကို တရား ဥပဒေမဲ့ ဖမ်းဆီး ခေါ်ဆောင်သွားပြီး သတ်ဖြတ်မှု မကြာခဏ ဖြစ်နေသည်။

မေလ ၂၅ ရက် နေ့ ကလည်း ဗန်းမော်ခရိုင် မန်စီမြို့နယ် မိုင်းခေါင် ကျေးရွာအနီး နေ့စားအလုပ်မှ ပြန်လာသည့် ဒေသခံ ကချင်လူမျိုး ၃ ယောက်ကို တပ်မတော်က ဖမ်းဆီးခေါ်ဆောင်သွားခဲ့သည်။ ထို့နောက် မေလ ၂၈ ရက်နေ့ ထို ၃ ယောက်ကို တပ်မတေ်ာက သတ်ဖြတ်ပြီး မြေမြုပ်ထားသည်ကို တွေ့ခဲ့ရသည်။

ထို့အပြင် ဇူလိုင် ၉ ရက် မနက် လီဒိုလမ်းမပေါ် Ting Kawk (တိန့်ကောက်) ကျေးရွာ တောင်ဘက် အစိုးရတပ် နှင့် KIA တိုက်ပွဲ အပြီး၊ တပ်မတော်က ဒေသခံ ရဝမ် တိုင်းရင်းသားများကို ဖမ်းဆီး ရိုက်နက်မှု ပြုလုပ်ခဲ့သည်။