အအေးဒဏ်ကြောင့် ကချင်စစ်ပြေး ဒုက္ခသည်များ အနွေးထည် အရေးပေါ် လိုအပ်နေ

Sha-it Yang IDPs Camp photo by kachinnet

ယခုနှစ် ဆောင်းရာသီ လွန်ကဲသော အအေးဒဏ်အောက် တိုက်ပွဲကြောင့် စခန်းပြောင်းရွှေ့နေရသော တရုတ်နယ်စပ် ကချင်စစ်ပြေးဒုက္ခသည်များအတွက် အမိုးအကာ အပြင် အနွေးထည်များ အရေးပေါ် လိုအပ်နေပါသည်။

အထူးသဖြင့် တိုက်ပွဲကြောင့် ထပ်မံ ထွက်ပြေးနေရသော ဇိုင်းအောင် (Zai Awng) နှင့် ခေါင်ရှောင် (Hkau Shau) ဒုက္ခသည်များ စခန်းသစ် တွင် ရာသီဥတု အအေးဒဏ်ကို ကျော်လွန်နိုင်ရန် အကူအညီ အများဆုံး လိုအပ်နေကြောင်း ဒုက္ခသည် တစ်ဦး ပြောသည်။

“အခုယာယီ ပြန်ချထားတဲ့နေရာမှာ ခြုံဖို့ စောင်တွေမရှိဘူး။ မိုးကာတွေ လိုအပ်နေသေးတယ်။ အနွေးထည် အကျီ၊ ခြေအိတ် လက်အိတ်တွေ အရင်နေရာကနေ အခု အရမ်းအေးတဲ့နေရာကို တခါတည်းပြောင်းလဲတော့ တချို့မခံနိုင်တဲ့သူတွေလည်း ရှိတယ်။”

ဇိုင်းအောင် စစ်ပြေးဒုက္ခသည်အချို့ လိုင်ဇာ (Laiza)၊ ပါဂျောင်ဘွမ် (Pajau Bum) ဘက်ရှိ ရှအိယန် (Sha-it Yang) ဘက်ပြောင်းလာသလို တချို့ ဝိုင်းမော်မြို့ စစ်ရှောင်စခန်းကို ပြောင်းလာသူများလည်း ရှိသည်။

လွန်ခဲ့သော ဇန်နဝါရီ ၂၁ ရက်နေ့ အိမ်နီးချင်း တရုတ်နိုင်ငံ ယူနန်ပြည်နယ်ရှိ ကချင်လူမျိုးများမှ အနွေးထည်နှင့် အမိုးကာ အကူအညီများကို နယ်စပ် ဒုက္ခသည်များကို ပေးလှူမှုများ ရှိခဲ့သော်လည်း မလောက်ငှသေးကြောင်း သိရသည်။

အထူးသဖြင့် နံနက်ပိုင်း နှင့် ညနေပိုင်းမှာ ရေခဲသည်အထိ အေးခဲသောကြောင့် စစ်ပြေးဒုက္ခသည် ကလေးနှင့် အသက်ကြီးရွယ်အိုများအတွက် ကျန်းမာရေး ဆေးဝါးပြုစုမှုများ အလွန်လိုအပ်နေကြောင်း လည်း သိရသည်။

  • Popular

  • Latest